Mkhatna' Klaika
Isoor rih dultipaam mkheng avah seemda. Mma ngi rei rek ungta ding rek ungta dii ungta bursi rek avah seemda. Isoor rih kni seemda avangi neen nih khuvaar tothlooi chaakin. Knisat nit rek thung ngi duun thah na'am cheu kni ngi mipluminda. Kni adotseem piikin leiyi, akpanpaak chaakin nah Isoor.
Kni ah kuu ngi mseem moh?
Rinpṭhunna' Maa 1
Adam le' Eve avah mkhatna' psel le' snu lam. Isoor rih mmaanve avah mdoseem lam. Mma ngi mmaanve amna'rah Eden tidit mmun kṭha khat pii chlamda. Mmaanve ah kanpa dok ki ka'am lam. Isoor rih doonkhaal rek rukka mdoseem. Psai atikhiu. Skoolkṭil lah tva'thuh ka'am ah?
Adam le' Eve ah ku ngi mseem moh?-+
Rinpṭhunna' Maa 1-2
Adam le' Eve pah kpursul chlamda ungta muplungin yada. Mmaanve ngi Isoor rih tloomaan mdodit dookhat mdotlot dokin. Tunnu mmaanve avah Isoor rih mraallin suukthuhna' mdopiik lam. Mmaanve ngi Eden thung ki mi'innin kṭha deek avah mdomaak raan thah tlada. Vaantamsi rek kih mkenlet raan rotpiik lam nimeh.
Adam le' Eve vah taluleiyi mi'innin kṭha deek avah mdomaak raan noh?
Rinpṭhunna' Maa 3
Adam le' Eve pih chapa knii thlooi lamda. Mmiingin avah Cain le' Abel lam. Abel vah Isoor pauthe pṭooi chda, pdainu Cain vah Isoor pauthe pṭooi mdah. Cain nih plungpthitda Abel eyouda. Havah mdoparma. Adam le' Eve pah kdung ngi muplung dungda. Isoor rukka muplung dungda.
Adam le' Eve chapa rekka kule' lammoh?
Rinpṭhunna' Maa 4
Isoor rih Noah ah arkuung kloinpa khat ksa rah sida. Avah Arkuwngpii (Ark) kuh mdit. Mchapa rekki Noah ah bom chlamda. Ark avah dii thuh ka'am pemeh. Pdainu mmun mkheng thuh dii kih dii mdimduh khimkhei kbeiyi khu krakra rah. Noah le' mi'innmii rek mkheng avah arkuung ava'thuh karsan chlam rah.
Khu mrat thung vah Noah le' mi'innmii rek avah tva'thuh ka'am chlam rang ngo?
Rinpṭhunna' Maa 6
Noah ngi arkuwng tsak pṭuda. Audil lih Isoor rih mdetmdet ki doonkhaal rek ungta pva rek avah kniini ngi arkuung ava'thuh kluṭhilam rah sida. Ava'thuh skool loolsaang rek knii ungta humpii knii ungta vaanpe knii kjaulam. Mmaan mkheng avah diilin thung vah arkuungpii ava'thuh karsan chlam rah.
Ava'thuh kanggaru tya kjaulam a?
Rinpṭhunna' Maa 7
Tunnu khu ah rara rarada. Kbeisek kih doo mkheng avah dii ngi armil dokdah. Pdainu Noah arkuung hehe ah dii leen nih phuundah. Asuun, Noah le' mi'innmii rek ungta arkuung ava'thuh ka'am doonkhaal rek avah Isoor rih kilrinṭhi chlamdah. Isoor rih naan ruk adotkilkrinṭhi chaakin.
Arkuung thuh ku ka'am?
Rinpṭhunna' Maa 7
Mii rekki arka'inn klinpa khat salamdah. Avah Babel Arka'inn nuh mdit. Mii rek avangi parvaan hankpha ngi tsak pchaan rah tidit tih bin chlamdah. Pdainu Isoor vah arka'inn mdosak raan avah ngei mdah. Mma ngi kparngapthi lam rah. Mtunkat daat tih mmaan nih khatle' khat pauna rek avah kerdei lam mdah!
Mii rek kih arka'inn mdosak raan kopdoon nah ku o?
Rinpṭhunna' Maa 11
Abrahm mah Isoor plap kenreel khat. Mnuun nah Sarah. Isoor rih Abraham hin nih khuupaam morson khat thah ksun rah sidah. Isoor rih Abraham hin nih mi'innmii rek kih ktlangknai kmah ma'am chaakna' raan mpaam avah mpum mih pii chlamdah. Abraham mah keelraam le' skoolraam knempok kih mdothlooi. Avale' avah atikhiu pchaanin nah?
Mepselpa miing nga talu o? Musnu miing nga talu o?
Rinpṭhunna' Maa 12.
Abraham le' musnu Sarah ah muplungin kdung ngi ngam chmeh mleiya mmaanve ah nau khatleh mdothlooi chaakin pemeh. Pdainu hava' pselnau klinpa avah ku o? Tunnu mmaanve ngi chapa khatthlooi chlamda. Mma' miing avah Aijek. Mmaanve a tunnu kanpa chlam mleiya Isoor rih mrinkthamin arthaan piik chlamda ungta chapa khat mdopiik chaak lam.
Abraham le' Sarah chapa miing tulu o?
Rinpṭhunna' 21
Aijek kah ver chdah, Rebekah ko'onṭhida ungta mmiing nga Jakop dilamdah. Jakop pah jachdah mluukam lung detda iip chdah! Mmer rih vaantamsi rek hangkkal le' jungkṭum dei lamdah. Audil lih Isoor rih Jakop hin nih, “Neiyi nang nga akilṭhi nikdi'”, dida.
Jakop pih talu mer mmer roh?
Rinpṭhunna' 28
Jakop pah mdokinphiirṭhi mu'upa Esau ka'am. Pselnau rek avangi mverindil lih mkerteen naan klinpa khat am chda. Jakop pah lam kla ngi sun chdah. Mṭutna'rel lih mma ngi Esau hin nih pau pthladah. Mma ngi veikhat tkorlot rah kngei a, dida. Tunnu mmaanve ah khatle' khat mkerdeh chaakin leiyi muplungin ngam chdah.
Unau rek miing avah talu talu o?
Rinpṭhunna' 33
Kderpu havah Jakop. Mma ngi chapa soomleiknii thlooidah. Mma ngi mchapa Joseph avah kdung ngi vonsat loochdah. Mma ngi Joseph avah kokroltluun kṭha langlang khat pii chdah. Joseph mu'umnau rek kah, mpain nih mmaan hin rukku kokroltluun mdopiik maan leivah kdung ngi muplungin thidah. Mmaan nah Joseph thennu muplungin mngam rah.
Josephpa vah mma' hinvah talu mpiik o?
Ripṭhunna' 37
Hava' naukdoong miing avah Moses. Hava' nla avah paamkruung chanu. Mma ngi kreng khat thung ngi tomkal khat thung kih naukdoong avah mdophan. Mii kṭhakma' rek kih naukdoong avah te'eyoo rah mdobinin. Isoor rih naukdoong ava' kdeirang kih ungta mma' kilrinṭhi chrang kih then nih pammkruung chanu avah mdopthlat.
Paamkruung chanu avangi naukdoong Moses avah tva' kih mpan noh?
Miipiiksun 2
Tunnu Moses tah mii klin khat kurthuuk chdah. Niikhat tu' mma ngi chaangchim khat kka pdainu kokrong ngi kka kma' deidah! Isoor rih chaangchim thung kih ngi Moses hin nih paudah. Isoor rih; “Chet rah nei kmii rek abomlam”, dida. Rukri vah Moses tah mningpṭitdah, pdainu Isoor rih, “Neiyi abom nikdi'”, dida.
Isoor rih Moses hin nih talu atloo mditto?
Miipiiksun 3
Isoor mii rek kah Igip paam thuh am lamdah. Riikchung ksin miipa hava ngi nong kdung ngi mdoloona' raan ksop lamdah. Mmaan nih Isoor hin nih mdobom lamna' rah kaktham chlam rah. Isoor rih, mii avangi mmaan mdoplim ava' kopdoon rah Moses kapthla rah. Moses tih Isoor mii mkheng rek avah kbom chlam rah.
Kuu ngi Isoor mii rek kah kbom chrang ngo?
Miipiiksun 5
Moses tih Pharaoh hin nih, Isoor mii rek avah Igip paam thung kih apsunlam, dida. Pharaoh ngi immeh, dida. Isoor rih Igip mii rek hin nih pdou rekle' uiṭok rek ungta morson tparsatna' rek avah mmaan chiikepreel rang ngi pthladah. Ava'kpha thuh Pharaoh ngi immeh, dida. Mṭutna'rel lih Isoor rih Igip innbung khimkhei thung kih chapa kver eyou nikdi', dida.
Pharaoh hin nih Moses tih talu mthe?
Miipiiksun 7-11
Moses tih Isoor mii rek hin nih mthurngut rekin tun nih ungta msiir rih hii kpubul rah silamdah. Isoor rih thurngut leen nih hii kurbul mdeh bih inn ava'thung kih kukhatleh eyou nimeh. Hava' mthuna' jaan avah Taplaanna' mdodit. Mṭutna' thangaro ngi Pharaoh ngi Isoor mii rek avah Igip asundaak lamso, dida.
Taluleiyi thurngut tun nih hii ka'am moh?
Miipiiksun 12
Isoor mii rek avah truun klinpa, Truunpii ksen mdodit ava' jool lih chet lamdah. Naan nih mpaangkhat le' mpaangkhat kih dii krip adeh pchaanin nah? Moses tih mukchung mahankhiin le' Isoor rih dii avah kan'aar. Tunnu mii rek vah laan kih hep pih truun thung ngi kchet lam.
Kuu ngi dii avah mdopan'aar roh?
Miipiiksun 14
Havale' innkhor vah thenpen mleksisi mdochomin. Isoor rih Mmii rek kih pooitham mdotonmana' raan nih parvaan kih thenpen mdoptlaak piiklam. Isoor rih Mmii rek avah mdopmaal chaaklam. Havah jiingsun ktaiyi mdoptlaak. “Akpanpaak chaak kah Isoor”, kdi snunau suun avah atikhiu o.
Thenpen avah tva'ki kthuuk koh?
Miipiiksun 16
Isoor mii rek kah kdung ngi mningin kraal chda, pdainu mdoneek raan dokhatle thlooilam mda. Isoor rih Moses hin nih, mukchungsin ava ngi lungpii avah keprei rah sidah. Mma ngi ava' mtlot thungta Isoor rih lungpii ava'thung kih dii mpthuuk dah. Audil lih mii khimkheiyi mningin kchim mih dii nee chlamdah.
Moses tih mukchungsin nih lung meprei thung ngi talu kthuuk koh?
Miipiiksun 17
Moses tih Isoor pauthe arja chdah. Isoor rih Mmii rek kih mdopṭooi raan mdongei kenreel noolam soom avah Moses hin nih thedah. Isoor rih hava' noolam soom avah lungphel leen nih mdokjit. Hava' noolam avah Pauṭum Soom muh, mdodit.
Isoor noolam soom avah talu mdit toh?
Miipiiksun 20
Oh, anto pemeh! Asuun noh Isoor mii rek kah talu mtlotdaatin nah! Mmaan nih silsuun kdudaat dopthla khat seem lamdah. Mmaan nih Isoor luukbu kma ngi dopthla luubu chlam dah. Hava ngi Isoor plung pthit lamdah ungta tupdun lamdah. Isoor rih hava' mdotlotin leiyi mraalin suukthuhna' mdopiiklam rang thah tladah.
Hava' mii rek kih talu mtlotin nah? Taluleiyi hava' kṭhakma' ah kthuuk?
Miipiiksun 31-32
Hava' mruungchen kṭhadeek buu'inn avah Mmun kenjesi yuh mdit. Avah Isoor inn. Mmun ava'thuh mii rek kih thleng lamdah, Isoor panpaak chlamdah ungta rinmdoktham chaakin. Mii rek kih Mmun kenjesi ava'thuh Isoor luu mdobuk chaakin. Mmaan luubuk'inn avah ava'.
Ava' Mmun kenjesi avah naan aluubuk'innin tu' kurdu ah?
Miipiiksun 35-36.
Moses tih lam ksootpa thung ngi mii rek avah ṭhi lamdah. Taluhep pih Moses tih tvahlam tṭooi rang tidit kdei rang ngoh? Mma ngi Isoor rih msik liklik kih mdopthuh armei khat ava' sutthlaam chdah. Moses le' mii rek avangi Isoor rih armei mdopche mdopchena' ava'dil ṭooi chlamdah.
Armei avah attkhiu pchaanin nah? Armeiya kuu ngi mdopche o?
Miipiiksun 40.
Hava' mii rek kih mdokdomin riithlum chei bal klinpa avah asuun noh! Mii rek miing avah Kelep le' Joshuah lam. Riithluum havah Isoor rih mmii rek hin nih apiiniknaan dida paumdoreelna' paam ava'thuh kmoong. Mii rek avangi Isoor rih paumdoreelna' paam ava' thung ngi kmowng riithlum ava' maplap rekin hin nih ktedet rang innlam thah koknot tih mdovan kdomin.
Hava' rithlum mah tva'thuh kmoong ngoh?
Chaittaina' 13-14
Pruul rek kih Isoor mii rek avah ptudah ungta aangṭhe rek kah diyou chlamdah. Isoor rih Moses hin nih pruul pthla kdu doo kseem rah sida. Pruul lih mdoptuk mii rek kih pruul pthla mdoaar avah suu chlamdah. Audil lih Isoor rih mmaan avah tipring lamdah.
Mii rek kipring ngah kuu o?
Chaittaina' 21
Isoor rih Balaam avah hava' lam thuh myuk rah ngei mdah. Mthungta Isoor rih mvaantamsi khat avah myukmana' rah mma' hin nih pthladah. Skoolraam avangi vaantamsi ava' mdeh thungta rip chdah. Balaam mih mchena' rah skoolraam avah bundah. Audil lih skoolraam avah paudah! “Taluleiyi adotbun plih?” dida. Mṭutna' thah Blaam mih vaantamsi avah deidah ungta Skoolraam avangi mchema leiyi muplung ngam chdah.
Skoolraam mih talu mthe o?
Chaittaina' 22
Isoor mii rek luukṭhi miknitna' avah Joshuah. Isoor rih Jerikho khuupii avah kpenvei pthirah sidah. Joshuah le' mii rek mkheng avangi mkhuupii roong ava' loi lamdah ungta putit dum lamdah ungta oong lamdah. Tunnu khuwpii roong avah tluchdah ungta Isoor mii rek avah vangluut pchaang lamdah.
Roong leen nih talu kthuuk kah?
Joshuah 6
Gideon nih Isoor miihal rek tu' karna rah raalmii punsoom tiṭhi rah ngeidah. Isoor vah mrukdaat mdoṭhi rah ngeidah. Isoor vah mapya ngi dii knee mii arja kdum daat kṭhi rah sidah. Gideon vah raalmii mnausuun daat tiṭhi rang nga mningpṭitdah, pdainu Isoor rih abom nikdi', didah.
Gideon vah raalmii tya mṭhi o?
Paukpindit rek 7
Samson nah kdung ngi mruhktang mii khat. Asuun noh tya ko'ol lih rii mokpo ah! Mpha khat thuh mma ngi mkhut daat tih humpii mdo'eyoo. Mpha morson khat nool thung ngi mma ngi Isoor miihal rek mrraalin suukthuhna' kpii rang ngi paamkruung inn avah mdoknoptluk. Isoor mii rek kbom chrang ngi Isoor rih mmah mruh pdoptan piik.
Mii ava' miing nga talu o?
Paukpindit rek 15
Hava' kokroltluun kna mii avah Job. Mmah mii kṭha mpha ktai thuh Isoor dothe ktloonuum kcha' mii khat. Audil lih Seitan nih Job hin nih ningṭitna' doo tupthuhna' rah Isoor hin nih kheel chdah. Job pah kdung ngi ya chdah pdainu mma ngi Isoor rah vonsat mdoloo chaak tlit daat.
Job pih Isoor rah vonsat mlootlit daatmoo?
Job 1
Parvaan pdit kvom dona kna avah Naomi. Mmah muplung kyamleiya mi'inpu le' mchapa rek avah kdiyou kcha'lam. Ruth vah Naomi ah muplung myatmana' mdobom chaak meek. Mma ngi Naomi tu' ta'amvena' rah tloodah. Isoor rih neen nah mii kbom kcha' mitupthut numin. Kuumii tbomna' kih then nih nang nga talu atlot pchaan?
Naomi kbom snu miing nga talu mdit toh?
Ruth 1
Samuel lah pselnausuun daat, pdainu mmah buw'inn thuh amda ungta Eli nong mdobom. Jaan khat tuh mma ngi krool khat tih mmiing mdo'oon arjadah. Rukri vah mma vah Eli ngi mo'oon pakdah, didah. Pdainu avah Isoor krool kurthuuk dah. Isoor rih Samuel then nih pau khat song dah. Samuel lih Isoor pauthe arja dah ungta avah pṭooi chdah.
Samuel lah kuu ngi mo'oon noh?
1 Samuel 2
Samuel mverdil lih, Isoor mii rek kih paamkrung khat ma'am rah ngei chlam dah. Hava'lei vah Isoor rah muplung ngam mdah. Mma ngi mparsatna' ka'am rah tidit mdodeh. Pdainu Mma ngi paamkrung rah Saul kchol dah. Saul lah klinksaang ungta mrungchen kṭha. Samuel lih mii hin nih, “Havah naan apaamkrungin. Mpauthe apṭooiyin,” dida.
Paamkrung ngah kuu kurthuuk koh?
1 Samuel 8
David tah Isoor plap kenreel khat. Mma ngi mmot kih kupṭhun nih mpa keelraam rek avah mdorun. Mbeh thah ṭiinreng ka'am adehn nah? Mma ngi Isoor vonsat adokloo chaak mdoditna ngi laa knempok kih kjit dah. Mma' laa knempok kih Baibal thuh ka'am. Mmaan avah Luubuk laa rek mdit.
David tih talu mikjit toh?
1 Samuel 16
Hava' humpu vah David keelraam rek avah tchaak rah bindah. Humpu ah atikhiu pchaanin nah? Isoor rih David avah tapraang dah ungta mruh taptan dah. Isoor dobom mih David tih humpu avah ke'eyou rah ungta avangi keelraam avah tiplim nimeh.
Humpu ava'vah keelraam mah kiplim rang? Taluleiyi kiplim kma' rang?
1 Samuel 17
Goliath tih Isoor mii rek avah kchei le' raalkaang mdosin nih tiplim lamrah bindah. David vah mjaiphi lung ngi Goliath avah tkah rah bindah. David tih Isoor rih mokbom rah tidit mdodeh. Lung avangi Goliath tah mmai thah pchukdon Goliath tah dulti thah tlu chdon kdiyou chrah. Isoor mii rek kah karsan chrah.
Goliath tah kuu ngi me'eyo oh?
1 Samuel 17
Paamkrung Saul lih mmiing Jonathan tidit chapa khat thlooi dah. David le' Jonathan nah plap kṭha kurthuuk chlam dah. Pdainu paamkrung Saul vah David tah te'eyo rah bindah. Jonathan nih David tah paamkrung tkordool daakna' leen nih bom chdah. Jonathan nih, mpa ngi; “havah tlooma',” didaat yoso, mma ngi Isoor dothe pṭooi dah David tbom rah, tidit deidah. Nang nei ruk kuh mpha ktai thuh Isoor dothe topṭooi chaak raan.
David plap pah kuu o?
1 Samuel 20
Havah jaan, ungta paamkrung Saul lah ki'iip kcha'. Mma ngi David tah ke'eyou rang ngi mdothlaam meeksli. David tah kordool meeksli pdainu mma ngi paamkrung Saul avah deikhot dah. David tih paamkrung avah kiplim rang? Isoor rih mma ngi paamkrung Saul mdoplim rah ngei meh. David tih Isoor pauthe ah kopṭooi rah.
David tih paamkrung ngah miplim moh?
1 Samuel 26
Tunnuh Samuel lah der chdah, pdainu ava'kpha thuh mma ngi Isoor sikhu khat kurthuuk tlit chdah. Isoor rih David luuchai leen nih kruun reidii klet rah sidah. Havah Isoor rih mii khimkhei hin nih, David tih Isoor mii rek kih miknitna' paamkrung kurthuuk rah tidit mdot'tdetna'. Paamkrung kṭha khat mkurthuuna' rah Isoor rih David tah kbom chrah.
Isoor mii rek kih then nih miknitna' paamkrung ngah ku rang ngoh?
1 Samuel 16
Tunnuh David tah Isreel rek kih paamkrung kurthuuk chdah. Hava' mdilpang kih jiiring buur klinpa ka'am avah Pauṭum ava' kih Pauṭum buur mdodit ava'. Mma ngi Pauṭum buur avah Jerusalem thah mdo'arhun sinmeek sli. Mkanpat chaak kih konchom dah. Mma ngi Isoor rah vonsat'loo chdah ungta Isoor rih mmah vonsat'loo chdah. Isoor rih nang ruk vonsat adot'loo. Nang ruk kdung ngi akanpat chaak rah.
Taluleiyi paamkrung David tah kdung ngi kanpa kcha' o?
2 Samuel 6
Hava' mruungchen kṭha snu avah Bath-sheba. Paamkrung David tih kdung ngi karmak dookhat tloo dah. Mma ngi mma' mdo'onṭhi chaakna' rah Bath-sheba inpu avah mdo'eyoo. Mma ngi hava' mtlot thuh Isoor noolam kenreel rek khat mdopkui. Hava ngi kdung ngi Isoor plung pthitdah, ava'leiyi Mma ngi David tah mraalsuukthuhna' piidah.
Taluleiyi David leen nih Isoor rah muplung kthiyo?
2 Samuel 11-12
Havah David chapa Absalom. Paamkrung raalmii rek kih mmah mdoreiyin mleiya mma ngi paamkrung pauthe mdopṭooi pemeh. Absalom mah ding ti ngi skoolraam tuung dah arva dah. Msam mih dingbaak rek leen tepmen dah, ungta moskoolraam vah kokthooi kcha ngi mdomaak pthi. Audil lih paamkrung raalmii rek kih phakhot chlam dah.
Absalom sam leen nuh talu kthuuk?
2 Samuel 18
David tah Solomon mdodit mchapa morson khat ka'am. Isoor sikhu, Nathan tidit avangi miknitna' paamkrung mdopthutna' rah Solomon luuchai leen nih mkhut thiik piikdah. Solomon nih Isoor hin nih kinrit paamkrung khat mkurthuhna' rah ktham chdah. Isoor rah Solomon leen nih muplung ngam chdah ungta paamkrung klin khat purthuh chdah.
Solomon nih Isoor hin nih talu mheipurthuh cha', dida mṭhil loh?
1 Paamkrung rek 1
Hava' snu chai knii rek avah nau leen nih ker'ei lamdah. Khat ruk khat ruk kuh nau avah mnau'in, kdi ngi korloon lamdah. Solomon vah naunuh dakdak kah kuu tidit dei dah. Mma ngi nau avah mnuh dakdak hin nih parlaan dah. Audil lih hava'hep kinrit paamkrung mdopiik chaaklam leiyi mii rek kih Isoor panpaak chlam dah.
Taluleiyi snu rek kah kerteen lam moh?
1 Paamkrung rek 3
Paamkrung Solomon nih Isoor then nih mruungchen kṭha langlang, Luubuk'inn tidit church khat sadah. Mmah ava' thuh kripdaat tah aden nah? Mma ngi Isoor panpaak chdah. Paamkrung nga kdung ngi muplung kngam kcha' mleiya mmah Isoor sikhu khat. Nang nei ruk kah Isoor sikhu rek tkurthuh chaakin kroo. Hava ngi Isoor rah muplung kngam chrah.
Paamkrung Solomon nih talu msak koh?
1 Paamkrung rek 8
Paamkrung Solomon nih Isoor noolam kenreel rek khat pkuidah. Mma ngi talu karmak mtlot toh, adehn? Mma ngi hava' jiiring ngi tsak saa rek hin nih rinkaktham. Neen nih ndehn tidit tah mma ngi Isoor hindaat tih rinmaktham chaak rah. Mma' leen nih Isoor rah muplung thidah ungta Solomon rinkum thung ngi tyatna' knempok kih kpii rah.
Solomon nih talu karmak mtlot?
1 Paamkrung rek 11
Elijah ah Isoor sikhu khat. Mmah thimpu khat mdodit. Elijah ah kdung ngi mpooi thamdah. Mma ngi Isoor vonsat'loo chdah, ava'leiyi Isoor rih hava' pva rek avah mma' hin nih thendam kpii rah mdosi. Pva rek kih mi'hin nih thendam mdosinthuh piikin adehn nah? Isoor rih mma' avah mdokilrinṭhi chaak. Isoor rih naan ruk kah adotkilrinṭhi chaakin.
Pva rek kih Elijah hin nih talu msinthuh piikin noh?
1 Paamkrung rek 17
Elijah ngi Isoor hin nih parvaan ki mei arjukkapthla rah sidah. Elijah at'tkhiu pchaanin nah? Mma ngi mkhut avah Isoor hin nih khiing chdah. Elijah ngi Isoor rah kdung ngi mruh ktang tidit t'det chdah. Isoor rih Elijah rinktham avah marthaan moh? Ong ngi! Isoor rih mdo'arjuk pthlat mei avah asuun!
Isoor rih parvaan ki talu murjukpthlat toh?
1 Paamkrung rek 18
Hava'thuh talu kthuuk kah? Isoor rih parvaan thah Elijah hunkṭhi rang ngi mei skool ungta mei skool koongklooi arjukpthla dah! Kuukhat tih Elijah avah veikhat dei meh. Mmah parvaan thah Isoor tu' ka'am kcha'. Elisha ngi thimpu ren kurthuuk chrah.
Skool rek avah talu ngi mdosak koh? Isoor rih Elijah ah tva' thahmṭhi chaak koh?
2 Paamkrung rek 2
Hava' snu avangi mdothlooi chaak thendam avah ksoor thung ngi kruundii mruk ava'daat. Isoor sikhu ren Elisha ngi kruundii mdothlooi sun avah ksoor knempok thung ngi koptlong rah sidah. Mma ngi moptlon moptlon daat arlaan ruk kuh moksoor thungki avah tlangvot mdah! Tunnuh mma ngi kruundii ksoor rek avah jur chdah ungta thendam ren chdah.
Taluhep pih Elisha ngi snu avah mbom chaak koh?
2 Paamkrung rek 4
Hava' snu avah Elisha plap. Nikhat vah mchapa sun avah kooidah ungta diyou chdah. Mnuh ngi Elisha hin nih heichen dah ungta mhin nih mheibom chau, didah. Elisha ngi rinktham chdah ungta pselnau avah veikhat ring kerheel chdah! Naunuh avah kdung ngi muplung ngam chdah. Isoor rih talu taluyoso mdotlot pchaan.
Pselnau ava' leen nih talu kthuuk koh?
2 Paamkrung rek 4
Hava' skool koongklooi leen kih mii avah kkooi. Snunau sun avangi mhin nih, Isoor sikhu, Elisha ngi mmah kapdam pchaang rah tidit thepiik dah. Namaan avah moskool koongklooi leen nih Elisha kpha rang ngi chet dah. Elisha ngi rinmaktham piik thungta Isoor rih Namaan avah pdam chdah.
Snunau avangi kkooi mii ava'hin nih talu mthepiik koh?
2 Paamkrung rek 5
Dulti thah ding koploom daat adehn nah? Hava' ksetnau rek avangi ṭhii rek kih ding mdopunthumin. Miilai khat ṭhii avah kreng thung ngi tladok dah ungta avah mril thah juntla chdah. Pdainu Isoor sikhu Elisha ngi ṭhii avah mkurphuunna' rah thedah. Tunnuh mii avangi mṭhii avah veikhat tsin phang chnool chdah.
Miilai khat ṭhiisin leen nih talu kthuuk koh?
2 Paamkrung rek 6
Hava' mii rek kah kanpa kcha'lam. Mmaan nih luwbuk'inn thah mahanin chunin nih silki le' khuung dum lamdah laa mdothein. Mmaan nih, “Isoor ruh akpanpaak chaakin nah” mdoditin. Nang le' nei ruk kuh Isoor rah tpanpaak chaak kroo. Neen nih nluun buudah ungta nmikin pjiing dah, “Isoor ruh akpanpaak chaakin nah,” tidit chaakin kroo.
Hava' mii rek vah Isoor hin nih talu mthein nah?
2 Pauminrit 20
Paamkrung Chapa Joash tah mkurthuh arlaan nih, mrilkṭha kma' mpi ngi mmah te'eyodok rah bindah! Mpakmoo le' mnuhkmoo ngi kum tikhiu mphaak kpha thung ngi dool chlam dah. Tunnuh mma ngi paamkrung kurthuuk kcha' ah. Raalmii rek kih mpi ngi mma' mdoplimmana' rah mpi ah neeng pthi lamdah. Joash tih Isoor rah vonsat'loo chdah ungta mmah paamkrung kṭha khat.
Joash tah kum tya kver roh?
2 Paamkrung rek 11
Hava' mii rek kah mluubuk Inn'in kportlot ckha'lam. Paamkrung Joash tih hava' nong avah totlot kṭha rah tidit deidah. Mii rek kih, Isoor rih mmaan then nih plungnee nong tyatya mdotlot piiklam mkheng kih then nih, mii khimkheiyi mdopanpaak chaakna' rah mmun khat ma'am rah ngei chlam dah.
Naan nuh taluleiyi Isoor rah tpanpaak chaak rah abinin nah?
2 Paamkrung rek 12
Jonah vah Isoor pauthe topṭooi rah bin mdah. Mma ngi arkuung khat leen nih kchen chrah korthlong dah, pdainu Isoor rih tchangkhu pthlat psuk dah. Jonah ah dii thuh varpthi lamdah. Tuulva klinpa khat tih mmah pyol chdah. Nii kdum dil lih tuulva avangi Jonah ah laan thah sitphui leen nih konso pthi dah. Tunnuh ngi Isoor pauthe ah kopṭooi chrah.
Jonah leen talu kthuuk kah?
Jonah 1-2
Paamkrung Ahaz tidit avah kṭha kma' paamkrung khat. Mma ngi mii rek hin nih luubuk Inn thurngut karkam pthi rah silam dah. Mma ngi kuu khatleh ruk kuh luutdon Isoor hin nih rinmaktham chaak raan mdongei pemeh. Isoor rih hava' mdotlot leiyi mraal suukthuhna' kpii rah. Naan aluubuk inn'in thurngut kuukhat tih adotarkam piikmaan leiyu kanpa chmaan timoh?
Luubuk inn thurngut leen nih talu kthuuk kah?
2 Pauminrit 28
Isoor mii rek kih paamkrung knempok rek kih dopthla rek luubuk chlam dah. Mmaan nih Isoor mii rek hin nih dopthla rek hin rinkakthamna' mlam purchuk lamdah. Mmaan nih dopthla rek hin nih mi'innbilin thung kih anthithoolnu kapṭhat rah silam dah. Mmaan nih khurat leiyi dopthla rek panpaak chlam dah. Havah kokmok nong mdotlotin. Tunnuh paamkrung Hezekiah mii rek kih dopthla rek avah teheemkre pṭhun lamdah ungta Isoor hindaat chrel lih rinkaktham chlam rah.
Mii rek kih talulu mupkui'in noh?
2 Paamkrung rek 18
Hava' mii avangi paamkrung Josiah hin nih Isoor noolam rek ava' mdoparcham piik. Paamkrung ava'vah hava' noolam rek kih mlei avah mdodeh pemeh. Tunnuh neen nih avale' avah topṭooi chaak raan ungta Isoor dongei rek ava' t'tlot chaak raan. Baibal thung ngi Isoor noolam rek avah tothlooi'in. Neen nih Baibal nparcham chaakin thung ngi Isoor pauthe pṭooi chdah Mma' plung tpangam chaak raan.
Talu thung ngi Isoor noolam mah tphan rang ngoh?
2 Paamkrung rek 22
Jeremiah ah Isoor sikhu rek arlak kih khat. Mma ngi mii rek hin nih Isoor rih talu mdotlot raan mngei tidit thepiik lamdah. Mii aangṭhe ngi mpauthe ah arjnuum lam mdah, ava'leiyi mmah hava' khor tlum khat thung ngi daalpthi lamdah. Jeremiah ah muplung kraang. Mmaan nih mturthut dokin dil ruk kuh mma ngi Isoor rih talu mdotlot raan mngei tidit avah thetlit chdah.
Hava' mii ava' miing nga talu mdit toh?
Jeremiah 38
Mruungchen kṭha Jerusalem avah kka kcha' ah. Isoor mii rek kahal kcha' mii rek kih mei mthlaar pthiin nah. Tluleiyi Isoor rih havah mdoptlot lam moh? Mleiya, havah khuupii thung ngi ka'am mii rek kih Isoor hin nih luutbuk kchang ngi dopthla rek hin nih luu mdobukin.
Mruungchen kṭha khuupii thuh talu kthuuk kah?
Jeremiah 39
Daniel le' maplap kdum rek kih paamkrung ava'tu' kirbi lamdah. Paamkrung avangi mmaan amna' khuupii Jerusalem avah mdopkaak pthidok. Pdainu tun vah paamkrung avangi Daniel le' maplap rek avah ngei lamdah. Paamkrung avangi kruupaam ava' tsutpṭooina' thung ngi mmaan dobom rah ngeidah.
Daniel le' maplap rek hin nih paamkrung avangi talu ktloo rah ksilam rang ngo?
Daniel 1
Paamkrung ngi mthin kih mapthla klinpa khat phun thidah mii khimkheiyi ava'hin nih rinmaktham chaak rah, didah. Pdainu Shadrach, Meshach ungta Abednega le'lim vah pthla ava'hin vah rinktham chlam mdah. Mmaan nih Isoor hindaat chrel lih rinktham chlam dah. Paamkrung ngah muplung thidah ungta mraalin suukthuhna' piilam nikdi', dida. Pdainu talu kthuuk kah tidit avah mmaadoon kih pthla thung ngi asuun.
Taluleiyi hava' chaikdum rek avah krip chdaat lam moh?
Daniel 3
Paamkrung avangi ngi Shadrach, Meshach ungta Abednego avah Isoor hindaat tih rinmakthamin leiyi mei thuh varpthi lamdah. Pdainu asuun noh! Mmaan nah mei thung nguh miilai plii ngi kandang lamdah! Isoor rih Mma' vaantamsi khat avah mmaan kilkrinṭhi chrang ngi arjukpthla dah. Mei avangi mmaan nah takhat ruk plim lam mdah.
Mei thung ngi talu ngi mmaan nah mkilrinṭhi chaak lam moh?
Daniel 3
Paamkrung avah mningṭi chdah. Mma ngi khut klinpa khat deidah. Khut ava'vah bang leen nih kjitdah. Paamkrung avangi tikjit rek avah talu mdothena tidit dei mdah. Pdainu Isoor rih Daniel hin vah pauna rek avah talu mdothena tidit thepiik dah. Pauna avangi mdothe ah paamkrung avah arvanṭha meh. Isoor rih mma' avah paamkrung tpurthuh porson nimeh.
Bang leen kih pauna rek avah talu mdit tah?
Daniel 5
Daniel vah Isoor hin hehedaat tih rinmdoktham chaak. Mma' vah paamkrung hin nuh rinktham chni meh. Paamkrung sikhu rek kuh Daniel lah mpooi ktham humpu rek khor thung ngi ptla lamdah. Mmaan vah humpu rek kih kcha chrah tidit mdobinin. Pdainu Isoor rih Daniel krisan rah vaantamsi mdopthlat. Humpu rek kih mmah takhat porloo lam meh.
Daniel hin nih talu kthuuk koh?
Daniel 6
Hava' mrungchen kṭha snu avah Paamkrungnu Esther. Mma ngi Isoor vonpsat chdah ungta Isoor mii rek leen nih plungṭhat mdothlooi chaak. Ungta mmah muplung kraang. Mma ngi paamkrung hin nih Isoor mii rek mdobom chaakna' rah ktham chdah. Paamkrung avangi mpauthe arjaak piikdah ungta paamkrungnu Esther rih mdoṭhil chaak avah mma ngi ktloo rah.
Paamkrungnu miing nga talu mdit toh?
Esther 5
Solomon nih mdosak luubuk inn avah kenvei chdah. Tunnuh mii rek kih mrungchen kṭha luubuk inn ren khat saa chlam dah. Havah mmaan luubuk chaakna' inn purthuh chlam dah. Mii mkheng ngi mthung ngi thleng dah rin maktham chaakin kroo. Isoor rah Mmii rek leen nih kdung ngi muplung ngam chdah. Mma ngi neen ruk kah luubuk inn thah chet dah Mma' luu tbuk chaak rah mdongei.
Hava' mrungchen kṭha inn miing ngah talu mdit toh?
Ezra 6
Vaantamsi Gabriel lih Mary hin nih kdung ngi kenreel pau khat mthe ah. Mma ngi mhin nih mmah Isoor Chapa nuh kurthuukna mdit tah! Mary ah kdung ngi muplung korkholjou chdah! Mma ngi kdung ngi muplung kngam kcha' mleiya mmah Miksanpiik nuh kurthuuk rah. Mma ngi Jisu, Mnau miing ngah kphuuk chrah.
Mary hin nih vaantamsi vah talu mtheo?
Luke 1
Zachariah le' Elizabeth tah chapa khat mdopluk chaakin leivah kdung ngi muplungin ngam chdah. Vaantamsi khat tih Zachariah hin nih mma ngi chapa khat kthlooi chrah ungta mmiing Johon kphuuk chrah, didah. Johon nih mverdil lih, mii rek hin nih Jisu karvang rah, tidit thedah. Nang ruk kuh aplap rek hin nih Jisu kih mlei avah adothe chaak rah.
Nau miing ngah talu mdit toh?
Luke 1
Havah Mary chapa. Mmiing nga talou mdit toh abinphaak kah? Havah Jisu! Mmah Isoor Chapa, pdainu Mmah keelraam le' skoolraam rek amna' sil'arku thuh kṭou. Mma ngi dultipaam thuh naukdoong ngi murjunduh parvaan thang vah paamkrung klin khat tih ka'am.
Jisu ah taluthuh kṭou oh?
Luke 2
Hava' keelraam krung rek avah paamlaiyi keelraam rek ksutpṭooiyi duun thah ka'am kcha'lam. Mtunkat daat tih mmaan nih vaantamsi khat dei lamdah. Mma ngi mmaan hin nih Bethlehem khuupii thung ngi sil'arku thung ngi Jisu kṭou ah tidit mmaan hin nih thepiik lamdah. Tunnuh morson vaantamsi knempok rek ruk kah thuuk lamdah. Mmaan nih Isoor rah ponlor chlam dah mleiya neen miksan chraan nih Jisu ah kurjung ngah.
Vaantamsi ava'vah keelraam krung rek hin vah talu mtheo?
Luke 2
Keelraam krung rek kih naukdoong ava' kthlaam mih khuu klin thah hanchen lamdah. Mmaan nih vaantamsi dothehep pih Mmah sil'arku khat thung ngi dei chlam dah. Mary ngi mnau ah mvonksadok kih arpom chdah. Jisu ah naukdoong morson rek jikdaat tih kandang pdainu keelraam krung rek vah Mmah Isoor Chapa tidit tah mdodeh chaakin. Vaantamsi avangi mmaan hin nih Jisu ah Miksankcha' tidit mdothepiik doklam.
Keelraam krung rek vah Jisu ah taluthuh mdehn noh?
Luke 2
Simeon nah kdung ngi kder kcha'. Mma ngi Isoor Chapa mmik kih tedeh chaak rang avah kum tya ksoot tih mdo'ardat chaak. Mary le' Joseph pih naukdoong Jisu avah Luubuk Inn thah hanṭhi lamdah. Tunnuh Simeon nah kdung ngi kanpa chdah! Mma ngi hava' kenreeldok Nau ava'leiyi Isoor rah panpaak chdah. Mma ngi mpha ksoot tih mdo'ardat chaak avah kurtluum dah.
Simeon nih mmik kih tedeh chaak rah bindah mdo'ardat tah kuu oh?
Luke 2
Havah Naukdoong Jisu le' Mnuh Mary. Lamkla kih mii kinrit rek avah Jisu hin nih chla rek kparlaan chrang ngi kthleng chlam. Mmaan nih Jisu hin nih mmaan kṭhi kcha'lam bursi avah dei chlamdah. Mmaan nih Jisu ah kdung ngi klin ungta kenreel khat kurthuuk rah tidit mdodehn. Ava'leiyi mmaan nih Mma' hin nih chla rek avah mdoparlaan chaakin.
Taluleiyi mmaan nih chla rek avah Jisu hin nih mdoparlaan chaakin noh?
Metthiu 2
Joseph pih Mary le' Naukdoong Jisu avah lamkla thah pjiinṭhi lamdah. Mmaan nah Naukdoong ava' ke'eyou rah kthee mii rek hin kih kchen kcha'lam. Mmaan nah Egypt paam thah jungkchen lam. Joseph hin nih lamkla thah Naukdoong avah achenṭhi mdodit avangi Isoor rih Jisu ah kilrinṭhi chda.
Taluleiyi mmaan nah lamkla thah kipjiin kcha'lam moh?
Metthiu 2
Jisu le' mphungka rek kah mi'inn than nih kerheel chlam dah. Tunnuh Jisu ah linbebet chdah. Mmah Isoor Chapa painu Mary chapa ruk kurthuuk. Mma nfi Mary le' Joseph dopurchu avah kṭha ngi mdo'arjaak chaaklam. Mmaanve ngi Mmah vonpsat chlam dah ungta Mma' ruk vah mmaanve ah vonsat'low chlam dah ungta mpauthein mdopṭooi chaaklam.
Jisu nuh ah kuu oh?
Luke 2
Tunnuh Jisu ah ver chdah. Kum soomleiknii phadok chdah. Mma ngi luubuk inn thung ngi Isoor mii luuksu rek tu' kirbi lamdah. Jisu ngi mmaan dothe arjadah ungta mmaan hin nih paukheel rek kheel lamdah. Mmaan mkheng rekin avah Mma' pau'arthaan leiyi ngak chlam dah.
Taluleiyi mii rek kah kngak kcha'lam moh?
Luke 2
Tunnuh Jisu ah verdah miikhat kurthuuk chdah. Mu'upa Johon vah Isoor vonsat kloo kcha' mii rek kah dii pluut chlam dah. Johon nih tuntun nih Jisu avah kreng thung ngi dii pluut chdah. Pthla Kchiir avah uṭhu hep pih parvaan kih arjungṭum dah. Parvaan kih Isoor krool lih hanto' thedah, “Jisu ah nei kvonsat'loo Kchapa,” didah.
Parvaan kih krool ava'vah talu mdit toh?
Luke 3
Hava' kokrol kṭil kna mii avah Nicodemus. Mma ngi taluhep pih parvaanpaam tutlun chaak rang tidit kheel chdah. Jisu ngi mhin nih kukuyoso Isoor Chapa hin nih lamkrin kcha' khimkheiya parvaan ktlung chrah tidit thepiik dah. Nang ngi Isoor Chapa miing ngah adeh ah? MmaJ miing ngah Jisu.
Mii avaJvah Jisu hin nih talu mdokheel loh?
Johon 3
Jisu ah maplap redk tu' kirbi lam. Mmaan avah Mma' sikhu rek lam. Aangṭhee rek kah tuulva kse mii rek lam, pdainu Jisu ngi mmaan avah Mma'dil kṭooi rah mdo'archil lam. Nang ruk kuh mii rek hin nih Jisu kih mlei ungta nang ngi Mma' vonsat adoloo chaak avah adothe piiklam kroo.
Jisu kbom kcha' rek kah talu mditin noh?
Johon 1
Hava' snu avah diirum thah dii ksuuk rah karva. Jisu ngi mhin nih Isoor tu' plung kngam rinkum avah mhin nih mdopiik pchaan tidit thepiik dah. Mma ngi Jisu lamrin chdah ungta maplap rek hin nih ksong chrang ngi vang dah. Mmaan ruk kah arva lamdah ungta Jisu lamrin chlam dah.
Jisu vah snu ava'hin nuh talu mpiik pchaan noh?
Johon 4
Hava' mii rek avangi jaan khat tih tuulva se chlam dah. Mmaan nih tuulva khadaat ruk kyoong chlaam mdah. Audil lih Jisu thleng dah mmaan hin nih veikhat leen kdeng lamrah sidah. Mma ngi tuulva rek avah leen thuh kluut lamrah sida. Tunnuh mii rek avangi hava' tuulva mkheng avah kyoong chlam dah. Jisu ah kdung ngi klin. Mma ngi talu taluyoso mdotlot pchaan.
Jisu ngi tuulva rek avah talu moptlot lam moh?
Luke 5
Jisu ngi mii rek hin nih Isoor kih mlei thepiik lamdah. Mma ngi Isoor rih neen nah mii khimkhei hin nih plung knei tkurthuh raan mdongei, mdodit. Mma ngi neen nah tker'e tkalrai rah mdongei pemeh. Jisu ngi neen nihin nih Jiirinmg noolam midotpiikin: “Nang ahin nih mdotlot raan adongei avah morson rek hin nih atloo.”
Morson khat tbomna' rah nang ngi talu atlot pchaan?
Metthiu 5
Hava' snunau avah kdung ngi kkooi kcha'. Mpa ngi Jisu kthlaam rah mchelik arlaan nih, snunau avah diyou chdah. Jisu ngi mma' inn thah thleng dah, “Snunau noh, ikerdel!” didah. Ungta mmah veikhat ringkerheel chdah. Nang ngi adeh ah mmah kdam kcha' ah. Jisu ngi tya tngana' mtlot daat tah!
Hava' snunau leen nih talu kthuuk koh?
Luke 8
Hava' mii avah mmik kjiing. Tunkat tih amik apjiing rah mmik kjiing dotlot atloo oh. Hava' nmikin nih khu tedeh pchaanin avah tngana' ah neh? “Nang ngi, Neiyi nang nga khu atepdeh pchaang nikdi' tidit lam'arin chaak pchaan nah?” Didah, Jisu ngi mii ava'hin nih kheel dah. “Ong ngi” didah, mii avangi arthaang dah. Audil lih Jisu ngi mmik avah kmeipiik dah ungta mma ngi khu dei chdah!
Nang ngi amik apjiin thung nguh talu adeh oh?
Mark 8
Tchangkhu kdung ngi mraan arlaan nih Jisu ah arkuung thung ngi iip chdaat dah. Maplap rek kah mningin ṭidah. Mmaan vah arkuung avah plup chrang pakdah mdoditin. Mmaan nih Jisu ah perdel lamdah. “Neen nkhengin nih kdiyou chrah nthein nah,” di lamdah, ko'oong lam. Jisu ngi ripdah tchangkhu avah kdoondok rah, sidah. Ungta tchangkhu avah doon chdah.
Jisu ngi tchangkhu hin nih talu ktloo rah msiyo?
Luke 8
Peter rah dii thuh tla chdah. Mmah tbom rang dah! Jisu ah mma' kbom rah arva dah. Jisu ah Peter hep pih dii thuh plup chmeh mleiya Jisu ah Isoor Chapa. Mmah dii leen kpha ngi mkhuh ngi kchet pchaang! Nang ngi aṭhil chaak bih Jisu ngi nang ruk kah atbom pchaan.
Peter rah dii leen nih kchet pchaang? Jisu ah mapchaan?
Metthiu 14
Mii rek kah mpooiyin tham chdah. Pselnau suun khat tih Jisu hin nih mvonthen avah parlaan chdah. Audil lih Jisu ngi mii khimkhei kih then nih kkhop tpurthuh dah. Jisu sikhu rek kih mii knempok hin nih then avah pii chlam dah. Jisu ngi hava'hep tngana' nong knempok kih mtlot pchaan!
Kuu ngi Jisu hin nih mvonthen mparlaan chaak koh? Jisu ngi avangi talu mtlot toh?
Johon 6
Hava' snu avangi mdothlooi chaak sum mkheng avah Isoor luubuk inn thuh parlaan chdah. Mma ngi Isoor rih mdopiik chaak doo mkheng kih then nih panpaak chdah. Mma ngi Isoor vonsat'loo chdah ungta Mma ngi mma' avah kilrin'hi chrah tidit deidah. Isoor rih Mma ngi midotpiik chaakin doo mkheng kih then nih tpanpaak chaak raan avah mdongei.
Isoor rih talu adotpiik chaak leiyi panpaak chnadiyo?
Luke 21
Jisu ngi nau rek vonsat mloo. Mpha khat thuh nuh rek aangṭhe ngi mnau rekin avah Jisu hin nih arheiṭhi lamdah. Jisu plap rek kih mmaan avah isundokin, dilam dah. Jisu theda; “Immeh, mmaan avah kihin nih arva lamso.” Audil lih Jisu ngi nau rek avah kdom lamdah ungta vonpsat chlam dah.
Jisu plap rek kih talu mthein noh? Jisu ngi talu mtheo?
Luke 18
Dulti thah koplom chdaat mii avah raanṭhul kupru rek kih kdung ngi mdoplim chaakin. Mii morson morson ruk kuh mdehn pdainu bom chlam meh. Tunnuh mii khat avangi ripdah ungta mlimna' rek avah klum piik chdah. Kbom kcha' mii avah kṭha Samaria mii, mdit. Nang ruk kah mii bom chdah kṭha Samaria mii akurthuh chaak kro.
Kṭha Samaria mii ava'vah talu mtlot toh?
Luke 10
Nikhat tu' Jisu ngi maplap rek, Mary le' Martha tu' kluhvon chasap lamdah. Martha ah kdung ngi kluh kih von vai chdah. Mary ngi Jisu pausaam daat mdo'arjaak chaak leiyi mmah muplung ngam mdah. Jisu ah Mary ngi pau mdosaam ava' mdo'arjaak chaak leiyi muplung ngam chdah. Mleiya mma ngi mdotlot avah mkenreelsi ava'.
Jisu pausaam karja kcha' ah kuu oh?
Luke 10
Keelraam krung khat avangi mkeelraam avah kṭha ngi kilrinṭhi chdah. Mma ngi kenvei ka'am daat ngaalmo tidit sutpṭooi chdah. Mma ngi keelraam suun mlim cheu kdom chlam dah. Jisu ngi Mmah kṭha keelraam krung hepdaat ping, didah. Neen nah keelraam hepdaat pimin. Neen nih Mma' avah nmikin nih deicha' myomin, neen ndehn neen mitkilrinṭhi chaakin.
Neen kih kṭha keelraam krung ngah kuu oh?
Johon 10
Lazarus tah Jisu plap rek arlak kih khat. Mmah diyou chdah ungta mdak avah buu jeel lamdah ungta lung thlaan thung ngi mdo'alruul dokin. Jisu thleng dah ungta rinktham chdah. Audil lih oong dah, “Lazarus, arvang thuuk!” Mtunkat daat tih Lazarus tah ringkerheel dah ungta arvang thuuk dah.
Jisu ngi Lazarus hin nih talu ktlo rah msio?
Johon 11
Hava' pthla thung kih miilai soom rek avah kdung ngi kkooi mii rek lam. Mmaan nih Jisu hin nih mheipdam chaan nuh mdoditin ungta Jisu ngi mdopdam chaak lam. Pdainu marlakin kih miilai khat chrel daat Jisu kpanpaak chrah thleng dah. Naan nih kuu miikhat tih atbom chaakin thung ngi akpanpaak chaak kah tidit rah adobinphaak raan kdobin chaak. Ungta mpha ktai thung ngi Isoor hin nih akpanpaak chaak kah tidit rah abinphaakin.
Hava' mii rek arlak kih mii tya ngi Jisu hin nih akpanpaak chaak kah mditin noh?
Luke 17
Hava' svangpa avangi Jisu hin nih taluhep pih parvaanpaam tlung chnikdi tidit kheel chdah. Jisu ngi mii avangi Isoor vonmdopsat hinvah msum vonsat mdolow tidit mdodeh. Jisu ngi mhin nih, asum mkheng avah aparlaan pthi ungta arinkum mah Isoor hin nih aprlaan cha'. Parvaanpaam tutlunna' rang kih then nih mma ngi msum vonsat mdoloo hinvah Isoor vonsat mdoloo chaak rah.
Mii ava' vah talu vonmapsat sio?
Luke 18
Hava' pa khat ava'vah mchapa mdo'arpom. Mchapa avah kchen chdok ungta veikhat inn thah ktlung kerheel kcha'ro. Mma' vah, mmah mpa vah vonsat'lo porson nimeh tidit tih mdobin. Pdainu mpa ah kdung ngi muplung kngam kcha'. Isoor rah parvaan kih Npain, ungta neen nih Mma' hin nih ntlunin thung nguh muplung kngam kcha'.
Parvaan kih Npainin nah kuuo?
Luke 15
Zacchaeus tih Jisu ksuu chrang ngi ding loon chdah. Jisu ngi mhin nih; “Arjungṭum mleiya tuniyu nang a'inn thah karvaim ping,” didah. Hava'lei vah Zacchaeus tah kdung ngi muplung ngam chdah. Jisu a'inn thuh mthlen leiyi nang ngah apklung kngam mah?
Jisu ngi Zacchaeus hin nih Jisu ngi talu mtheo?
Luke19
Jisu ah skoolraam leen nih tuung dah Jerusalem thah karhang ngah. Hava' snunau ava'vah Jisu ah tya tngana' ah tidit laa ngi thedah. Nuh le' pa le' ruk kuh muplung mgamin mdot'tdet chaakin nih dingbaak rek klek chlam dah. Mmaan mkhengin nih Jisu ah mmaan paamkrung ren tupthuh rah mdongei chaakin.
Snunau ava'vah talu mtlot toh?
Luke 19
Jisu ngi maplap rek arlak kih khat khuh mdo'arṭhut meek. Kverdok mii vah mthina ngi mkhuh ah mdo'arṭhut chaaklu. Mmaan vah morson khat khuh kulṭhuh ah mdongeiyin pemeh. Pdainu ngei myomin neen nih mii morson tbom chaak raan.
Nang ngi t'let chaak rah abin arlaan nih ava' kchang ngi anuh adobom chaakna' mpha adobinphaak ka'am mah?
Johon 13
Jisu ngi maplap kṭha rektu' mṭutna' mpha thung ngi kluhvon chasap chlam dah. Havah M'utna' Kluhvon nuh mdit. Mma ngi maplap rek hin nih, kbeisek kih Judas tih raalmii rek ṭhidon Mmah kokyoong chlam rah, didah. Audil lih mmaan nih Mma' avah ke'eyou lamrah. Neen kih Miksanpiik mkurthuh pchaanna' rang kih then nih Jisu ah kdiyou.
Jisu ah kuu ngi kokyoong chrang ngoh?
Luke 22
Jisu ah rinktham chdah. Mma ngi nupnu arvein leiyi Mmah kdeiyi diyou nikdi' tidit deidah. Mma ngi Isoor rih mdobom chaakna' rah ktham chdah. Isoor rih mdongei mkurthuh bih Mma ngi tidiyoo rang avah mdorot. Nang le' nei ruk kah Jisu hep tkurthuh raan. Neen nih mpha ktai thung ngi Isoor rih mitoptlot nuumin ava' t'tlot chaak raan.
Jisu ngi talu mtlot toh?
Luke 22
Tunnuh kdung ngi mmeel kthi dookhat thuuk chdah. Judas le' raalmii rek avah Jisu kokyoong rah ungta kṭhi chrang ngi thuuk lamdah. Jisu plap rek mkheng avah mningṭitin nih chen chlam dah. Mmaan nih Mma' tbomna' rah tloo lammeh.
Jisu plap rek kih talu mtlotin noh?
Luke 22
Peter rah, raalmii rek mthuh thung ngi kchen kcha'dok Jisu plap rek arlak kih khat. Tunnuh Peter rih plei mdonee. Mma ngi Jisu deimaang mdodit. Mmah Jisu plap mkurthuh leiyi mii rek kih kiplim lam kro tidit leiyi mningkṭi. Jisu vonsat adoloo tidit mii rek hin nih t'the rah t'den ruk kuh ningpṭitma'.
Taluleiyi Peter rih plei mdoneeo?
Luke 22
Raalmii rek kih Jisu ah Pilate tidit mii ava'hin nih ṭhi lamdah. Pilate tih mii rek hin nih Jisu ah apthla pthiin mdit pchaan. Pdainu Pilate tih ava' t'the rang ngah mningkṭi. Mma ngi Jisu ah apthla pthiin mditbih mii rek kih mmah ngei lam nimeh tidit leiyi mningkṭi. Ava'leiyi mma ngi, “Jisu ah mdiyoo rah,” mdodit.
Taluleiyi Pilate tih Jisu ah mdopthlatma o?
Luke 23
Mmaan nih Jisu ah me'eyoo meekin nah. Mmah ding pheikhang leen nih kdiyou sli ah. Taluleiyi mmaan nih Mmah mdo'eyoo meekin noh? Mma ngi karmak mdotlot ka'am mooi? Immeh! Nang le' neiyi nong karmok t'tlotin leiyi Mmah kdiyou meek ah. Neen nupnu rekin leiyi Isoor hin kih nraalin suukthuhna' rang avah Jisu ngi Mma' leen nih mdotapptlaak.
Taluleiyi Jisu ah kdiyou o?
Luke 23
Jisu mdiyoo dil lih, Maplap rek kih mdaksa avah thlaan thuh alruul chlam dah. Tunnuh havah Easter jiingsun. Snu knii rek kih thlaan arheisuu lamdah. Pdainu Jisu daksa avah ava'thuh am mdah! Isoor rih Jisu hin nih rinkum veikhat pii chdah, ungta arvang thuuk chdah! Jisu ah veikhat kring chnool lah!
Jisu ah tun kpha thlaan thuh ka'am chdaat moh?
Luke 24
Jisu ngi rinkum thuh mkerheel dil lih, Mma ngi hava' plap rek hin nih pau thedah. Pdainu mmaan vah avah Jisu tidit dei chlam mdah! Mmaan nah kdung ngi muplungin kya kcha' mleiya mmaan nih Jisu kdiyou dok kcha', tidit tih mdobinin. Mtunkat daat tih mmaan nih Mmah Jisu tidit dei chlamda! Jisu ngi rinkum thuh mkerheel mdeh chaakin thung ngi mmaan nah tya thuh muplungin kngam kcha'o!
Taluleiyi Jisu plap rek kah muplungin kya'o?
Luke 24
Asuun noh talu kthuuk meek kah! Jisu ah parvaanlai thah hungkal meek slidah! Mmah Mpa amna' parvaanpaam thah kuhung meek kah! Mma ngi maplap rek than chlam dah. Pdainu Mma ngi veikhat arjung kerheel nikdi', didah. Audil vah mmaan mkhengin avah mpha ktai ka'amsap chlam rah. Neen ruk kah Mma' tu' ta'amsap chaak raan.
Jisu ah tva' thah kṭooiyo?
Luke 24
Jisu parvaanpaam thah muhun kenlet chaakna' arveen mruk dil lih, Jisu ngi neen nuplungin thuh ka'am rang ngi Pthla Kchiir arjupthla dah. Mtunkat daat tih mmaan nih khatle' luuchai leen nih meilasisi arjukleng dei lamdah. Naan nih avah atikhiu pchaanin nah? Audil lih mii rek avangi mmaan nih mdodeh maan pau vih tpau pṭhun chlam dah!
Mluuchaiyin leen nuh talu ka'am moh?
Tamsi rek nongtlot 2
Hava' mii avah teden ruk kuh chet pchaang cha'mlai. Mma ngi mmotsuun ruk kuh kchet pchaang kcha' pemeh. Pdainu tunnuh naan nih mmah mkanpat tih konchoom chaak adehn nah. Talulu kthuuk daat tah? Jisu plap rek, Peter le' Johon nih mo'omlai avah mdorei pthiin! Pthla Kchiir avangi mmaan hin nih hava' ruhtanna' avah mdopiik lam.
Peter le' Johon nih talu mdotlotin noh?
Hava' noom leen nih ktirdiil mii avah Stephen. Mma ngi mii khimkhei hin nih, Jisu daat tih mupnu arve rekin avah moptlot piik pchaan tidit mdothe. Mma ngi Jisu ah tya tngana' ah tidit mdothe avah mdodoon liit pemeh. Hava' mdothe avangi mii rek plung tipthit dah. Mmaan nih mma' avah lung ngi mdiyoo duh khimkhei thung ngi deeng lamdah ungta Jisu tu' ka'am chrang ngi parvaan thah kuhung kcha'.
Taluleiyi mii rek kah muplungin kthio?
Tamsi rek nongtlot 7
Isoor rih maplap, Philip avah skool koongklooi leen kih mii ava' kpha rah sidah. Philip pih mii ava'hin nih Isoor kih mlei thepiik dah. Mii avangi Isoor mii tkurthuh chaak rah ngei chdah. Philip pih mhin nih mma ngi Jisu hin nih lammrin chaak bih Isoor plap kurthuuk chnah tidit thepiik dah. Naan ruk kah Isoor plap kurthuuk pchaang chnaandi'.
Philip pih mii ava'hin nih talu mtheo?
Tamsi rek nongtlot 8
Paul lah Isoor miihal khat kurthuuk chdah. Mma ngi Jisu lamkrin kcha' mii rek kiplim rah ungta ke'eyou rah chetdah. Mtunkat daat tih, klengyou kcha' mar'aang khat mleen nih leng dah ungta Paul lah dulti tah tlu chdah. Jisu ngi parvaan kih ngi arjubi dah. Audil lih Paul lih, Jisu ah Isoor Chapa tidit mii khimkhei hin nih song chdah.
Kuu ngi parvaan kih ngi Paul hin nih mbiik koh?
Tamsi rek nongtlot 9
Peter rah mma ngi, Jisu ngi vonsat mloolam ungta mmaan then nih kdiyou, mdodit leiyi roonginn thuh mdodaalin. Isoor rih Peter kbom chrang ngi vaantamsi khat pthla dah. Vaantamsi avangi Peter khut le' khuh leen kih thiirrii rek avah perkhek pthidah. Roonginn thurngut rek avah chungkamke tepkeh pdainu vaantamsi avangi pvang pthidah ungta Peter rah duun thahvangthuuk chdah.
Peter tbolna' thiirrii leen nih talu kthuuk koh?
Tamsi rek nongtlot 12
Timothy ah mpi ngi mhin nih Baibal paumin sitpiik dah. Mma ngi mverdil lih mii knempok hin nih Baibal kih mlei ungta Jisu kih mlei kthepiik chrah. Baibal lah Isoor rih neen nihin nih midotpiikin laika. Hava ngi Isoor rih neen nah kdung ngi von mitapsatin tidit mdothe.
Nang ngah, nang ado Baibal athlooi chaak moh?
2 Timothy 1
Naan nih Paul lah abinphaakin nah? Tunnuh mmah Isoor plap kurthuuk kcha'. Mma ngi hava' arkuungpii thung ngi lamklah thah kipjiin rang ngi korlou chdah. Mma ngi khuupaam morson thah kipjiin. Mma ngi mii rek hin nih Jisu ngi mmaan nah vonsat mloo chaaklam tidit kthe rah kchet. Paul lah nongsikhu khat. Nang ruk kah nikhat bih nongsikhu khat kurthuuk kcha' kro ptih.
Paul lah tva' thah kṭooio?
Tamsi rek nongtlot 13
Paul le' Sailas tah roong'inn thuh am lamdah. Mmaan nah mii khimkhei hin nih Jisu kih mlei mdothein leiyi roong'inn thuh mdodaalin. Pdainu Isoor rih maplap rek avah mdoperthle chaak lam. Mma ngi kdungyou kcha' ringnaang pthuuk dah mdobool naan thiirrii rek avah kerthlet chdah. Roong'inn thurngut rek avah karkam pdainu kparvangpet chdah!
Taluhep pih Isoor rih Paul le' Sailas tah mperthle lammoh?
Tamsi rek nongtlot 16
Paul lah tchangkhu kdung ngi kraang khat thung ngi arkuung khat thung ngi tuung dah. Arkuung ngah kuplup kcha' pdainu Paul le' mthung kih mii khimkhei avah karsan kcha'lam. Isoor rih Paul diyoo khot rang ngah mdongei pemeh mleiya Isoor rih mmah nongsikhu mdopthuh nuum. Isoor rih mma ngi mii khimkhei hin nih Jisu kih mlei mdotepthe nuum.
Arkuung leen nih talu kthuuk koh?
Tamsi rek nongtlot 27
Paul lah veikhat nool lih roong'inn thung ngi am chnool dah. Mma ngi ava'thuh mpha ksootdok kih am chdah. Tun vah Isoor rih mma' kperthlet rang ngi ringnaang pthuuk meh. Isoor rih mmah vonsat mloo chaaktlit daat pdainu Mma ngi mdoperthle pemeh. Marlaklak kuh Isoor rih neen nah tparsatna' tya arlak kih midotpa'am. Pdainu Mma ngi neen nah mpha ktai thung ngi vonsat midot'loo chaakin.
Paul lah tva' thuh ka'am ah?
Tamsi rek nongtlot 28
Johon nah Jisu tu' karman nih ka'am plap khat. Johon nih nih mder chaak dil lih, parvaanpaam avah mrinmer mditma tah mmer ksaangpa khat deidah. Mma' mer ava' thung ngi mma ngi Jisu ah parvaanpaam thah ka'am deidah. Johon nih mmer rih mdodeh avah kjit chdah. Mma' dokjit laika avah Pauphuun tidit ava'. Hava' laika avah Baibal thung ngi ka'am.
Kuu ngi mrinmer rih parvaan mdeh o?
Pauphuun 1
