KSENNU KSENPA REK
Alraang kih kupṭhun nih tuni kpha thung ngi Ksennu Ksenpa rek kah saa mkaan ruk kuh saaluu pkal dah, saa aidah. Svang pulraang kthuuk ma'amin ruk kuh Totlang kam kchok lamdah. Totlang mka'imin thung vah neelaa thedah, silki, khuung, taampu, putiit ungta ungta pengkhul dum dah kporchong kpalrou vih arvang ka'am kcha' kchok lam Tuni kpha ruk kuh nupa piipu noonaat avah kurkhum mih tlo myoso aangṭhe ah mdovantlot tlit chaak daat. Tbinphaakna' lung tya ruk arvanphun kchok lamdah.
Parvaan vonsat tih tuntun nih npii-npu, nnuh-npah ungta nchaatti kih alrou, sum le' daar daatkma' neela, npauminin tya avah kder klaam rek tya ngi midotsun daakin tu' kilṭhi ngi arvang kenvei betbet chdah. Mpha mruk dilvah Ksenpa pauna, neelaa kenvei chrang ngi tlodah. Hava'hep kih mpha ava'thung ngi SIL (Summer Institute of Linguistic) kih npauin daat kma' neelaa, noonaat, paumin ungta morson morson havah tsut kro, tarjaak kro ungta tparcham kro ngi, tuni kpha thuh teheibinphaak pchaanya avah tirkhiik chaakna' rah suuṭhat mipii chaan dah tunvah nirkhiikin mruksuun daat yoso ka'am nupṭhun chaakin nah. Ava'leiyi, Isoor rah kdung ngi panpaak chaan cheh mleiya nmii-nsa kma' Jessy Glover, Lera, Maria ungta Dmetry le' thuuk lamdah tunnuh ksuun-kder rih piipu kih arlimnee tya avah mnausuun daat yoso tdeh kphang chlam rah.
