Chaatti doona kihil kna avangi Lamkaang ruungchen pthuuk dah ungta mchaat vonsat klo mdopurhui. Ksennuh rek kah kphal kru, kkam kporchong ma'am cheu ngaan buh klap dah koolpa karva avah mdoprim chaaklu. Hava' mkurduh kih nla rek korthlon avah Totlang kkam thung kih hep pih kirsim korbool kcha'lam. Hava' le' avah LIKBK, Lawngtlai thah Lamkaang Choir kjung rek kih Ksennu Ksenpa buudiir tetdetna' khat tih kardaam lam. Hava' nla rek donaak dona miing rek avah; 'tkar knik myaar ksen' ungta knikti ngi 'diiphuun' mveisapin nah ungta pṭhi ksen mdonaakin avah 'ardei', kpool avangi 'arlo' ungta mlool kiin avah mdilpang thah kokthoi 'kep' ava'. Ungta hava' mmalaiyin kih nla chaiplii rek kih mbaan thaan nih mdonaakin havah 'haar' le' jiichai 'panthla' mnaakin nah. Mluu leen kih avah 'changbom', changbom mah luukok seemdah ava' leen nih sarkhuṭui leen nih tarnap pih keelki le' harsep mdoton kthen.
Hava' mkurduh kih rek avangi snu psel kirsim lam. Pselpa buudiir lah psel knik kuh didah diiphuun vei dah ungta buu kvom jaangkperjeel dah, likin kpool mdojeellu. Pselpa ngi 'voorii' le' 'kaangkool' mdohor ungta snu psel kurdujik kih mkhuhprai thah 'saisang' mdopirsit. Pselpa vah kaang mdohorna ngi 'kaangkool' lah mdohor ungta Ksenpa noonaat thung ngi pselpa vah laamtuul mvanthuh daat le' 'pulraangkoi' avah mlaarneena' khat tih mdoton snu vah mdoton pemeh.
